ليه ساعات بحس إني مش مبسوطة
عمرك عملتي حاجة كويسة بس حسيتي إنك مش مبسوطة أوي؟
أو مثلا أنجزتي مرة حاجة صعبة وبعدها بشوية حسيتي ولا كأنك عملتي حاجة؟
أو أوقات مثلا بتبقي مستنية حد يقولك كلمة حلوة، ولو متقالتش بتكتئبي وتضايقي وممكن تتعبي؟
طب عارفة بقى كل ده وغيره كتير بيحصلك ليه ؟؟!!
ببساطة بيحصل ليكي ولغيرك بالشكل القوي ده علشان معندكيش حاجة اسمها (التحفيز الذاتي).
يعني دايما مستنية حد يسقفلك، يقولك برافو إنتي صح، يقولك شاطرة كملي. حد يمدح تصرفاتك ويعجب بيها. حد يأكدلك أهمية اللى بتعمليه علشان تقدري تواصلي. ولو ملقتيش ده بتقفي مكانك مش قادرة تتحركي.
طبيعي إن الإنسان يبقى محتاج دعم وتشجيع من بعض الناس حواليه. ربنا خلقنا محتاجين بعض وخلى الصحبة فى حياتنا حاجة مهمة أوي. لكن اللي مش طبيعي إن الإنسان يبقى عايش بس على التشجيع والدعم الخارجي ده. مش طبيعي إنه يبقى بيتغذى نفسيا عليه، ولو قلّ أو متوجدش خالص في بعض الأوقات نتعب ونتوجع، وممكن في بعض الحالات حياتنا كلها تتوقف.
نتوه ومنبقاش متأكدين احنا ماشيين صح ولا غلط، نكمل ولا مش مهم.
الموضوع ده غالبا بيبقى نتاج شكل معين في التربية في المقام الأول ثم ثقافة مجتمع كامل بعد كده، وبيأثر بشكل كبير على حياة كتير مننا، لكن للأسف تأثير سلبي.
صعب جدا (بل يكاد يكون مستحيل) تلاقي حواليكي طول الوقت التحفيز اللي محتاجاه علشان تكملي. صعب يتوفرلك من كل الناس اللي بتحبيهم أو مهتمة بآرائهم.
الناس مشغولة وعندها اهتمامات مختلفة، مش فاضيين إنهم طول الوقت يركزوا معاكي علشان يدعموكي…
ولو فاضيين ومركزين، مش حتلاقيهم دايما قادرين يسقفولك ويشجعوكي ويقولولك برافو…
ولو قادرين يعملوا ده فمش بالضرورة يكونوا شايفين اللي بتعمليه يستحق التسقيف، أو حاسين بأهميته…
ربنا خلق الناس مختلفة عن بعضها، وعقولها وثقافاتها وخلفياتها كمان مختلفة، وبالتالي أحكامهم بتكون مختلفة، وتقديرهم ونظرتهم للأمور بتختلف تماما عن بعض.
بعد كل ده لما تفضلي في انتظار أحكامهم وتقديراتهم علشان تاخدي التحفيز والتشجيع اللي انتي محتاجاه، يبقى انتي بتعرضي نفسك لخطر كبير. وبتوقفي حياتك وانجازاتك اللي ممكن تحققيها، وبتحطي قدامك عقبات انتي في غنى عنها.
وعلشان تتفادي كل المشاكل دي محتاجة تخلقى جواكي انتي حاجة اسمها (التحفيز الذاتي).
الموضوع سهل وييجي بالتعود. خدي القرار انك حتحاولي، وركزي معايا في الكام نقطة الجايين..
أولا: تعرفي على مميزاتك ونقط قوتك.
اتعلمي تشوفيها وتتصيديها، وقوليها لنفسك بصوت عالي علشان تتحفر جواكي وتبقي دايما فاكراها.
ثانيا: حسي بانجازاتك.
لما يبقى وراكي شوية مهام أو مسؤليات، اتعودي تركزي فيهم وتحصريهم قبل ما تبدأى فيهم. اكتبيهم فى ورقة أو مذكرة على تليفونك. وكل ما تخلصي منهم واحدة، اجري ع الورقة بتاعت المهام واعملي قدامها علامة صح. وقولي لنفسك أنا خلصت كذا وأنجزته. حسي بالإنجاز في أقل الأشياء مهما كانت صغيرة وبسيطة.
ثالثا: كافئي نفسك.
اتعودي تكافئي نفسك على أي إنجاز تحققيه وعلى أبسط المهام. استعملي أبسط المكافآت واستمتعي بيها.
يعني مثلا لو انتي ربة منزل، وطبختي الأكل بتاع اليوم وخلصتيه…ده انجاز في يومك كتير من الستات بيكسلو عنه ويستسهلوا أي حاجة جاهزة. كافئي نفسك بكباية عصير، واقعدي حتى لو 5 دقايق مع نفسك وانتي بتشربي العصير واستمتعي بيه على إنه مكافأة ليكي على إنجاز مهمة من مهامك اليومية.
لو انتي بتشتغلي وخلصتي حاجة مهمة في شغلك، روحي اطلبي من البوفيه فنجان قهوة وخديلك معاه شوكولاتاية وخدي بريك 10 دقايق استمتعي فيهم بمكافئتك وانتي بتكلمي نفسك عن الحاجة المهمة اللى أنجزتيها وعن استحقاقك للمكافأة اللذيذة دي.
الموضوع يبان من بره بسيط لكن تركيزك واستمرارك فيه حيفرق معاكي كتير. ومع التعود حتلاحظي فرق كبير في حياتك ونفسيتك وتعاملاتك مع اللي حواليكي، والأهم نظرتك لنفسك واحساسك بيها.
وتأكدي إن تطبيقك للخطوات اللي فاتت دي واستمرارك فيها حيخلق جواكي التحفيز الذاتي اللي يخليكي تستغني عن جزء كبير من اعتمادك على الدعم والتشجيع الخارجي، وإن كان مش حيختفي لأنه طبيعة آدمية فينا، لكن حياخد حجمه الطبيعي الصحي لينا وللي حوالينا.
وبالتعود حيكون ده نمط حياتك اللي حيغير فيها كتير.
جربوا واكتبولي النتايج.
ليه ساعات بحس إني مش مبسوطة