القائمة اغلق

تقسيم الأعمال ل3 مجموعات

مقال #3 من سلسلة (أسر أطفال ما دون الثالثة)

إن يبقى عندك طفل أقل من 3 سنوات، ده بيتطلب منك مجهود وأعمال ووقت وطاقة كبار جدا..
إن يبقى عندك طفلين 3 سنوات وأقل، فده بيضاعف المجهود والمسؤوليات ل4 أضعاف مش بس اتنين..

من المهارات المهم جدا الأم تتعلمها في الحالات دي..
(مهارة الأولويات)

انتي عندك بالفعل عشرات المهام والمسؤوليات اللي مطلوب منك القيام بها يوميا..
وبالمنطق والعقل، وبقدراتنا البشرية الطبيعية 😄 مش حتقدري تقومي بيهم كلهم كل يوم، وعلى أكمل وجه..

وهنا بقى تيجي مهارتك في تقسيم المهام والأعمال دي ل3 مجموعات:
🔹طارئة
🔹مهمة
🔹ممكن تأجيلها

الطارئة: هي أعمال مش حتعرفي تخططي ليها .. ولا يمكن توقعها .. دي بتتفاجئي بيها كده زي القضا 😅 ومينفعش تتأخري عنها
زي مثلا إن أخ بيحاول يخنق أخته .. أو أخت بتحاول تدخل القلم جوه ودن أخوها 🙆‍♀️
كوباية لبن اتدلقت ع الأرض .. أو كوباية زجاج وقعت اتكسرت 50 حتة 🤦‍♀️
دي كلها مهام بتحصل فجأة بدون توقع مننا، وبتحتاج تدخل سريع وإلا وقع أذى وضرر على الأولاد أو علينا..

الأعمال المهمة: وهي المسؤوليات اللي لو نقصت من يومك، انتي أو الأولاد حيقع عليكم ضرر ولكن فيها مرونة شوية في تحديد وقت القيام بها..
زي الأكل والشرب والنوم وخلافه..
دي كلها مسؤوليات مهمة جدا، وضرورية، وفي نفس الوقت أقدر أخطط لتوقيت القيام بها إلى حد كبير..
وتشمل المجموعة دي مجموعة أعمال تانية ضرورية حنتكلم عنها كمان شوية 😉

المسؤوليات الممكن تأجيلها: ودي بقى دايرتها واسعة، وبتشمل مهام كتير.
زي غسل الغسيل، تطبيقه، ترتيب الدواليب، تنضيف البيت … إلخ
عارفة حتقولي ايه 🙎‍♀️
ازاي يا يسرا يعني عاوزاني أأجل غسيل وتنضيف وخلافه؟؟؟؟
حقولك طبيعي جدا جدا إن البيت اللي فيه أطفال أعمارهم صغيرة، ميكونش بنفس شكل ومستوى نفس البيت لما الأولاد دول يكبروا شوية، ويبدأوا يتولوا بعض مهامهم الشخصية بنفسهم..
وحقولك كمان ده مؤشر صحي
!!!!!! ازاي يعني صحي!!!
حرجع تاني ل (مجموعة الأعمال الهامة)، الأعمال الضرورية اللي أجلنا الكلام عنها فوق…
صحي لأن تقليلك شوية في الاهتمام بالغسيل والدواليب والتنضيف، معناه إنك وفرتي بعض الوقت في يومك، اللي تستخدميه في (تنشئة وتربية) هذه الأطفال..
الأطفال في السن الصغير ده زي ما بيحتاجوا مهام كتير، بيحتاجوا تواصل كتير…
*بيحتاجوا شخص يكلمهم وهو عينه في عينهم، مش كلمة ع الماشي وأنا بجري من المطبخ لأودة النوم علشان أخلص اللي ورايا..
*بيحتاجوا شخص يقعد معاهم على الأرض ويلعب معاهم بلعبهم..
*بيحتاجوا شخص يعلمهم ويطور مهاراتهم من خلال اللعب، اللي بيحتاج وقت يومي نقضيه معاهم بتركيز معاهم هم وبس..
*بيحتاجوا شخص يمثل معاهم مسرحيات بالعرايس ويقعدوا يضحكوا سوا..
*بيحتاجوا شخص يقرأ معاهم كتاب بسيط ويكلمهم عن الصور اللي فيه..
*بيحتاجوا ينزلوا يتمشوا شوية في الهوا والطبيعة، مهما كانت التمشية بسيطة..

كل دي أمثلة فقط على المهام اللي بيحتاجها الأطفال في السن الصغير، غير الأكل والشرب واللبس..
الأطفال دول مش بيتربوا لوحدهم..
ولا بيتعلموا لوحدهم..
ولو حصل كده بيطلعوا نضجهم وشخصياتهم فيها مشاكل..
ده غير صحتهم النفسية اللي بتضعف جدا من قلة التواصل العاطفي مع الأم والأب بتركيز وتخصيص وقت ليهم هم فقط..

وببساطة كده يومك 24 ساعة فقط ..
والأولوية فيه لازم تكون ل(مجموعة الأعمال الهامة)، بكل الأمثلة اللي قلناها فيها..
بالإضافة لأوقات تانية حتحتاجيها ل(مجموعة الأعمال الطارئة) زي ما قلنا..
ولو اتبقى وقت “ولقيتي نفسك قادرة” بعد كل ده تعملي جزء من (مجموعة الأعمال الممكن تأجيلها)، يبقى أهلا ومرحبا 🤓

يومك ووقتك هو رأسمالك مع نفسك ومع أولادك .. أحسني استخدامه واستثماره في الأنفع والأصلح ليكي وليهم

اكتبولنا في التعليقات ايه المشاكل التانية اللي بتقابلكو مع التوائم أو أكتر من طفل تحت سن 3 سنوات، علشان نتكلم عنها في بوستات قادمة 🤩
♦️ومتنسوش اللايك والشير على صفحاتكوا لأنه مهم لينا♦️

رابط المقال على فيس بوك

Comments

comments