الحامل وقت الجلوس وعلاقتها بالسلحفاة
الجلوس بالنسبة للحامل، خاصة في النص التاني من الحمل، هو معاناة..
والمعاناة هنا في حاجتين اتنين:
الحاجة الأولى هي الجلوس نفسه. فبمجرد ما تبدأ الست الحامل بطنها تكبر وتتدور (وده بيختلف معاده من ست لست بس غالبا يبدأ من الشهر الخامس أو السادس في الحمل) بتضغط على ضهرها.
تخيل كده لما يبقى عندك شوية غازات في بطنك، واللي هي أصلا شوية هوا، شوف بتبقي حالتك عاملة ازاي. بطنك واجعاك جدا ومش عارف تقعد ولا تنام إلا لما تتخلص من الغازات دي.
ما بالك بقي الست الحامل دي جواها بني آدم صغير، وكمان علشان البني آدم ده يعرف يعيش فربنا سبحانه وتعالى بيملى رحم الأم بسوائل تساعد الطفل على الحياة فترة الحمل وتحميه جوه بطن أمه. يعني جواها بني آدم عايش جوه بالونه مليانة ماء.
حاول تتخيل بقي الوجع والضيق اللي بتبقي حاسة بيهم ليل ونهار
طيب لما البطن الكبيرة المدورة دي بتضغط على ضهر الأم وهي قاعدة، بتعمل إيه؟!
بتحني ضهرها قليلا لقدام علشان تتغلب على وجع ضهرها وهي قاعدة.
ولما بتحني ضهرها ولو شوية صغيرة بيحصل إيه؟!
بتلاقي جسمها وضهرها ضغطوا على بطنها، فتبدأ توجعها وتبدأ التقلصات. فترجع تفرد ضهرها لورا علشان تريح بطنها…ولما بطنها تضغط على ضهرها ترجع تحني ضهرها لقدام علشان تريحه…وتضغط تاني على بطنها…وهكذا تفضل ما بين وجع ضهرها وألم بطنها طول ما هي قاعدة.
وعلشان كده أغلب الأوقات دي بتحتاج مساعدة علشان تعرف تقوم من مكانها. يا إما تمسك فى حاجة ثابتة تشد بيها نفسها، وده في حد ذاته بيعمل ضغط على عضلات بطنها.. أو تطلب من جوزها الهمام يشدها يقومها.
حد شاف قبل كده السلحفاة لما بتتقلب على ضهرها؟؟!!
يعيني بتفضل نايمة على صدفتها مقلوبة كده وبطنها لفوق، ومش عارفة تعدل نفسها ولا تيجي على جمبها ولا حول ليها ولا قوة…لدرجة إن ممكن في بعض الأحيان تموت من الجوع وهي ع الوضع ده.
أهو ده تقريبا بيبقى نفس وضع الست الحامل لما بطنها بتكبر وتبدأ تضغط على عمودها الفقري.
نصيحتي ليك عزيزي الزوج..
1. ما تتريقش عليها وهي في الوضع ده لأنها بتبقى حساسة جدا الأقل كلمة. حس بيها وتعاطف معاها..
ويا ريت لو شوية دلع زيادة تهون بيه وجعها
2. ساعدها.. وياريت من غير ما تطلب هي.
ساعدها وانت مبتسم وبتهزر معاها لأنها بتبقى محرجة وحاسة إنها حمل عليك…فكفاية عليها الحمل اللي شايلاه جواها.
ونصيحتي ليكي عزيزتي الحامل..
تأقلمي..
مش مع الوجع، لكن مع الوضع. فكري نفسك دايما إنه وضع مؤقت وكلها شوية ويخلص.
ومتتكسفيش من طلب المساعدة، ولا من التعبير عن مشاعرك. خديها بضحك كأنها نكتة.
وتاني افتكري إن كل ده وضع مؤقت حيخلص بعد شوية.
حيخلص وتبدأ مرحلة جديدة بمميزاتها وحلاوتها وكمان عيوبها…
ولينا لقاء تاني
الحامل وقت الجلوس وعلاقتها بالسلحفاة